Ed era governata i nu Collegiu
di ottu (dui sìndaci e sei eletti )
distrubuìti secundu u cuntenggiu
chi 'nu Statutu rìgidu permetti:

Quattru nòbili ( î sangu o privilegiu )
e quattro popolari. Quandu stetti
n' annu ô governu poi cangia u collegiu.
E però u vecchju, prima u si dimetti,

proponi u successori. U Parlamentu,
formatu i tutti i capi di famigghja,
cunferma sta proposta. E, cû consentu

î tutti l' Università ripigghja
i funzioni. S' 'on voli u Parlamentu
atti persuni u cullegiu cunsigghja.

Pe chidi tempi e pe l'economia
dî terri nostri Castelvetere era
veramenti na fonti e na minera
di forzi, di ricchezzi, e maestrìa.

Lìgnàmi, rami, ferru, cca ndavìa;
e genti onesta, proba, assai sincera.
L'Erariu funzionava; e giusta c'era
a tassazioni pe ogni mercanzìa:

Si pagava in natura, e pe pagari
nu rotulu d' arroba era abbastnza,
speci quand'era arroba pe mangiari.

U capitanu d'armi ogni arroganza
frenava; e u Bagghju servìa a giudicari
a ogni omu onestu dandu rilevanza.

Omini illustri allura ricordamu;
cà tra mèdici, nòbili, avvocati,
ndavìmu tanti mò mu nda cuntàmu
chi furu tutti quanti preparati.

Musicisti, poeti nui vantamu,
òmini î chjesa santi, e letterati,
e giuristi, e filosofi, e 'on scordamu
militari, politici, scienziati.

Prima i famigghj ricordamu tutti:
Oltr'ê Carafa, e l'atti nominati,
comu i Canosa, i Ruffo, e puru Asciutti,

ndavìmu i Musco, i Niutta, l'Argirò;
e ndannu u sonnu certu ricordati
i Lombardo, i Minici, ed i Cundò.