Na vota nu previti nta crescia
Ndavia pensatu u faci pulizia
Pigghiau na scopa ch'era bella longa
E jia girando intra a sacristia.

Cu idu ndavia tanti chirichetti
e a ognunu detti u so defari
eranu belli comu all'angiuletti
ma eranu na massa di litrari.

A purvarata supra ad ogni cosa
paria di nu seculu posata
e nta nu vasu chi indivia na rosa
era nduruta comu o basulatu.

Longau o cielu u manicu da scupa
e u vociava intornu o lampadariu
nu grossu ragnu nci cadia i supra
e si posava supra o vestiariu.

Cuntinuandu u caccia a purvarata
ca scupa chi nchinava e chi scindia
jiu u s'introppica supra a na navata
spostandu u crucifissu chi ndavia.

Ca botta chi pigghjiau u crucifissu
nnacau nu pocu e si sciuppau du chiovu
era pisanti ch'era fatti i gissu
nci catti supra o pedi pover'omu.

Volia mi grida,
mi ciangi e mi jiestima
ma si guardau intorno stracangiatu
videndu chigli facci d'angialedi
chi si scasciavanu d'arrisi a perdijiatu.

Si rivolgiu o Cristu tuttu ruttu;
ndavia tantu locu addurvi u cadi,
e propria supra a mia ?
Pe oji a missa ta dici tu
ch'eu m'indafuttu
ca mi ritovu cu stu pedi ruttu.

Santo Strati 2001