Volìa mu realizza l'Utopìa,
e tutti nui mu poti liberari;
e De Rinaldis; sociu soi, a Turchia
chjamau, e ndeppi ardìri d'accettari

chî Turchi î tandu na consorteria.
Ma si a filosofia è da studiari;
è da studiari pe filosofia,
non pe scienza chi servi a cumandari.

E Canpanella certu si sentìa
maestru i tutta ormai l'umanità;
dissi ca vinni u struggi in verità

tirànnidi,sofismi, e i ipocrisia;
e cu potenza, sapienza, e bontà
facìa sparìri ogni brutta bugìa.

Campanella pensava â perfezioni
du mundu; e allura vozzi u si ribella.
E dicìa Tommasu Campanella
ca cui seguìa i paroli ed a lezioni

ch'idu dettava, seguìa a religioni
vera di Cristu. Fratellu e sorella
èramu tutti. Ma a ognunu a pagella
ndi prepara, e separava i boni.

Bonu era cui seguìa sta teoria,
cui da natura ndavìa ricevutu
signi precìsi, chi l'astrologia

mustrava chjari; e potìa dari ajutu
(cà chistu è u scopu da filosofia)
a cui senza u maestru esti perdutu.

E Campanella allura si mentìa
u maeatrì ja, e u detta a verità;
e predicava paci e libertà,
dicendu ca distruggi a tirannìa.

E comu a distruggìa, si câ Turchia
stringìu alleanza ? E Cighàla Pascià
cu Amurath Rais vinni cca
pemmu u nci duna ajutu e cumpagnia ?

Ciovanbattista Biblia non tremau
e cu Fabio di Lauro rivelava
a congiura; e poi u prìncipi arrestau

Campanella; e prestu u carcerava
a Castelvetere: Nciu cunsegnau
nu Musuraca chi a Roccella stava.