E mò contru Cighàla certamenti
vozzi a Madonna ancora mu nd'assisti,
si no comu si spiega ca nta nenti
ficimu u s'alluntana e nommu u 'insisti ?

Certu,u castedu nostro era potenti,
preparatu pe misi mu resisti;
però Sinan Cighala era na menti,
na màchina di guerra, chi conquisti

ada ndavìa fattu pe tutta sta terra;
e distruggìu gelseti ed agrumeti;
Bovalinu, Cirò, Montileoni

furu pe misi contru idu in guerra;
'rrubau cavalli, sradicau vigneti,
'dduvi passau dassau na distruzioni !

Sei anni prima du Milleseicentu
Cighalà vinni a nui; ma nd'assistìu
a Madonna; e u briganti sa fujìu,
veloci come vinni, comu ô ventu.

Quandu pigghju nu libru,e leju, e sentu
ca tandu Castelvetere vincìu
- u dici Fiore - eu pensu ca criscìu
a fedi nostra nta chidu momentu

tantu chi ognunu ndeppi forza e menti
capaci mu respingi e u jetta sutta
stu vecchju musulmanu delinquenti

chi contru a nnui ncia misi propriu tutta;
però non riuscìu u cumbina nenti
e si nda jìu cu na flotta distrutta.

E vincendo Cighàla diventau
Castelvetere forti ed ammirata;
e n'atta bona fama poi pigghjau
quandu pe n'atta vota fu chjamata

mu sarva chisti terri; ed accettau:
da Fabriziu Carafa fu guidata.
A Stilu Campanella preparau
na ribellioni; e già tutta a vallata

di Precariti, du Stilare, e l'Assi,
era nu rigugghjri di ribelli;
ndavìvanu sbarratu tutti i passi

Tommasu Campanella ndavìa jutu
(-'ccussì si dici- ndavìa progetti belli!)
perfino è Turchi mu nci cerca ajutu.