E intantu Campanella pubblicava
"Città du Suli", l'opera famosa:
E a società perfetta ndi spiegava
nta setti mura fulgida e preziosa.

Nte setti mura ognunu s'imparava
quantu scoprìu a scienza d'ogni cosa.
E su Suli tutti i cosi illuminava;
e a vita era tranquilla e laboriosa.

Non esti u Suli chidu ch'è nto cielu:
E' u filosufu stessu Campanella.
Ma u suli veru - u dici già u Vangelu

- non guarda ogni persuna o brutta o bella,
ma luci a tutti; e quandu cadi u jelu
cadi per tutti; u cielu 'on è chjachjella !

Ma mò passamu ô Setticentu: Tandu
Castelvetere ndeppi i megghju tempi.
Luntani i jorni nostri èranu, e i scempi
chi mô ô pajisi jamu custatandu.

E' megghju u Setticentu (ancora quandu
Sapìvamu mu damu giusti esempi )
u ricordamu, cà 'on trovamu sempi
belli cosi mu jamu ricordandu.

Dî mineri parrammi, e comu a vita
era china d'impresi e di lavuru.
E non scordamu l'industria dâ sita

chi dava a tutti guadagnu sicuru.
Ndavìa mattuni e ciaramìdi i crita,
e non custava assai fari nu muru.

Era efficienti l' Università,
ch'era propriu u sistema feudali
chi dunava a nna pìcciula città
nu guvernu autonomu e speciali,

cunsentendu mu godi libertà
di fronti ê feudatari. Universali
e non particolari, in verità,
interessi guardava. Ed era mali

daveru grossu s' 'on sapìa u difendi
l'interessi du pòpulu. U signori
feudali, s'era tali u pretendi,

mustrava vuci grossa e nigru cori.
E l' Università ndavìa mu tendi
m'abbatti a presunzioni i stu signori.