Pe parti nostri è storia, ormai accertata,
ca propria i primi apòstuli passaru;
e San Petru e San Pàulu dassaru
a Petru d' Antiochia Caulonia amata.

Pocu doppu chi a Cruci fu azzippata
(e forsi i caulognìsi dà ajutaru)
armenu chisti terri già trovaru.
u primu vìscuvu,ed a giusta strata.

Si na leggenda dici ca soldati
di guarnigioni Caulonia tandu
tenìa dint'a l'esercitu romanu,

quandu nchjovaru a Cristu, ricordàti
ch'ogni leggenda nesci propria quandu
u fattu ricordatu è ormai luntanu.

Nesci a giustificari ogni sfortuna
da cui poi Caulonia fu pigghjata,
cà tanti voti non nda vaji una
bona (Caulonia pari disgraziata).

Allura dinnu: - Cristu non perduna,
cà a Cruci da nu' atti fu nchiovata- .
Però cui dici chisti non ragiuna,
ch' ogni cosa da Cristu è perdunata.

Si dicìa "bruzio" ogni calabrisi,
e di Bruzj risulta ca ndavìa;
perciò si dissi: "Ndavìa Caulognìsi,

quandu a Cruci di Cristu si surgìa".
Ma mu staci tranquillu stu pajìsi
e nommu accricchja ad ogni dicerìa.

Mu guarda ê fatti ! E certu i fatti spièganu
ca Caulonia ininterrottamenti
fu cristiana. Cà i Bruzi si lèganu
fin già du primu sèculu,cuntenti,

â fedi î Cristu, e l'ìduli rinneganu.
Quarcunu resta ancora indifferenti;
ma certu i cchjù si cunvertunu e pièganu,
e a fedi in Cristu i rendi cumbattenti.

E cumbattunu contru i farsità,
contru a mitologia superstiziosa,
contru i Giudèi e i seguaci d'Allàh.

E cumbàttunu doppu (oh bella cosa !)
contru l'imbrogghj dâ modernità
tutti i Carafa,i Ruffo, ed i Canosa.